ბიზნეს გეგმა წარმოადგენს სტრატეგიულ დოკუმენტს, რომელიც აღწერს კომპანიის ან პროექტის მიზნებს, სტრუქტურას და განვითარების გზებს. ეს არის საგზაო რუკა, რომელიც გვიჩვენებს, თუ როგორ უნდა მივაღწიოთ დასახულ მიზნებს და რა რესურსებია საჭირო წარმატებული სტარტაპის შესაქმნელად.
ბიზნეს გეგმის დაწერა რთულია?
ბიზნეს გეგმა ერთი შეხედვით მარტივი დოკუმენტია თუ მის დაწერა ხშირ შემთხვევაში გამოწვევად იქცევა ხოლმე.
მისი სირთულე დამოკიდებულია თქვენს გამოცდილებაზე, ბიზნესის ტიპსა და გეგმის სიღრმეზე.
საფუძვლიანი გეგმის შექმნას შეიძლება რამდენიმე კვირა ან თვეც კი დასჭირდეს, რადგან მოითხოვს ბაზრის სიღრმისეულ ფინანსურ და ოპერაციულ კვლევას.
თუმცა, სტანდარტული სტრუქტურის გამოყენება და არსებული რესურსების (სახელმძღვანელოები, შაბლონები, ონლაინ ინსტრუმენტები) გამოყენება ამარტივებს პროცესს. ზოგიერთ ნაწილს, მაგალითად ფინანსურ პროგნოზებს, შეიძლება დასჭირდეს სპეციალიზებული ცოდნა. მნიშვნელოვანია გვახსოვდეს, რომ დიდი ალბათობით, პირველი ვერსია არ იქნება სრულყოფილი და გეგმის გადახედვა და განახლება ნორმალური პროცესია.
ბიზნეს გეგმა სხვადასხვა კომპონენტებისგან შედგება. უკეთ გასაგებად უმჯობესია თითოეული მათგანი დამოუკიდებლად განვიხილოთ.
შემაჯამებელი რეზიუმე – ბიზნეს გეგმა ნაბიჯი 1
შემაჯამებელი რეზიუმე არის ბიზნეს გეგმის უმნიშვნელოვანესი ნაწილი, რომელიც წარმოადგენს მთელი დოკუმენტის მოკლე შეჯამებას. ის უნდა იყოს მკაფიო, დამაჯერებელი და ინფორმატიული, რადგან ხშირად ეს არის პირველი (და ზოგჯერ ერთადერთი) ნაწილი, რომელსაც პოტენციური ინვესტორები ან პარტნიორები კითხულობენ.
განვიხილოთ ბიზნეს გეგმა EcoTech-ის მაგალითზე, რომელიც მზის ენერგიაზე მომუშავე პორტატულ დამტენებს აწარმოებს.
აღმასრულებელი რეზიუმეს სტრუქტურა და შინაარსი ასეთი იქნება:
- ბიზნესის კონცეფცია: დაიწყეთ თქვენი ბიზნესის მოკლე აღწერით. მაგალითად: “EcoTech არის ინოვაციური სტარტაპი, რომელიც ქმნის მზის ენერგიაზე მომუშავე პორტატულ დამტენებს სმარტფონებისთვის.”
- მისია და ხედვა: წარმოადგინეთ კომპანიის გრძელვადიანი მიზნები. “ჩვენი მისიაა გავხადოთ მზის ენერგია ხელმისაწვდომი ყველასთვის, ხოლო ხედვაა შევქმნათ მსოფლიო, სადაც ყველა მობილური მოწყობილობა იმუშავებს განახლებად ენერგიაზე.”
- პრობლემა და გადაწყვეტა: აღწერეთ პრობლემა, რომელსაც თქვენი პროდუქტი ან სერვისი წყვეტს. მაგალითად: “მილიონობით ადამიანს აწუხებს სმარტფონის დაბალი ბატარეა, განსაკუთრებით მოგზაურობისას. ჩვენი პროდუქტი საშუალებას აძლევს მომხმარებლებს დატენონ თავიანთი მოწყობილობები ნებისმიერ ადგილას მზის ენერგიის გამოყენებით.”
- ბაზრის შესაძლებლობები: წარმოადგინეთ ბაზრის ზომა და ზრდის პოტენციალი. მაგალითად: “გლობალური მობილური აქსესუარების ბაზარი შეფასებულია 80 მილიარდ დოლარად, ყოველწლიური 5.7% ზრდით. მწვანე ტექნოლოგიებზე მზარდი მოთხოვნა ქმნის იდეალურ გარემოს ჩვენი პროდუქტისთვის.”
- კონკურენტული უპირატესობა: ახსენით, რა განგასხვავებთ კონკურენტებისგან. შეგიძლიათ ასე აღწეროთ: “ჩვენი პატენტი საშუალებას გვაძლევს შევქმნათ ყველაზე მცირე და ეფექტური მზის დამტენები ბაზარზე.”
- ბიზნეს მოდელი: მოკლედ აღწერეთ, როგორ გამოიმუშავებთ შემოსავალს. მაგალითად: “ვყიდით პროდუქტებს პირდაპირ მომხმარებლებზე ონლაინ და საცალო პარტნიორების მეშვეობით. ასევე ვთავაზობთ პრემიუმ გაწევრიანების მოდელს დამატებითი სერვისებით.” ინვესტორს მარტივად აუხსენით ფულის შოვნის მოდელი.
- ფინანსური მიმოხილვა: წარმოადგინეთ ძირითადი ფინანსური პროგნოზები. “ველით 5 მილიონი დოლარის შემოსავალს პირველ წელს, 20 მილიონს მეორე წელს და 50 მილიონს მესამე წელს, 30% წმინდა მოგების მარჟით.” ამ დროს კარგი იქნება თუ ინვესტორს უჩვენებთ რას ეყრდნობა თქვენი მოლოდინები.
- გუნდი: ძალიან მოკლედ წარმოადგინეთ ძირითადი გუნდის წევრები და მათი გამოცდილება. მაგალითად: “ჩვენს გუნდს ხელმძღვანელობს ჯონ სმიტი, Tesla-ს ყოფილი ინჟინერი, და სარა ჯონსი, Apple-ის ყოფილი მარკეტინგის დირექტორი.”
- დაფინანსება: მიუთითეთ, რამდენი ინვესტიცია გჭირდებათ და რისთვის გამოიყენებთ მას – “ვეძებთ 2 მილიონი დოლარის ინვესტიციას წარმოების გასაფართოებლად და გლობალური მარკეტინგული კამპანიის დასაწყებად.”
რჩევები ეფექტური შემაჯამებელი რეზიუმესთვის:
- შეინარჩუნეთ სიმარტივე: იდეალურ შემთხვევაში, რეზიუმე არ უნდა აღემატებოდეს 1-2 გვერდს.
- იყავით კონკრეტული: გამოიყენეთ რეალური რიცხვები და ფაქტები ზოგადი განცხადებების ნაცვლად.
- გამოიყენეთ მკაფიო და ლაკონური ენა: მოერიდეთ ჟარგონს და რთულ ტერმინოლოგიას.
- დაწერეთ ბოლოს: მიუხედავად იმისა, რომ ეს არის პირველი სექცია, უმჯობესია დაწეროთ ის მას შემდეგ, რაც დაასრულებთ მთელ ბიზნეს გეგმას.
- მოარგეთ აუდიტორიას: თუ იცით, ვინ იქნება თქვენი მთავარი მკითხველი (მაგ., ვენჩურული კაპიტალისტები, ბანკები), მოარგეთ შინაარსი მათ ინტერესებს.
- გადაამოწმეთ და გადაამოწმეთ კიდევ: დარწმუნდით, რომ არ არის შეცდომები ან უზუსტობები.
კარგად დაწერილი რეზიუმე შეიძლება იყოს გადამწყვეტი თქვენი ბიზნეს გეგმის წარმატებისთვის, ამიტომ დიდი დრო გამოყავით ამ ნაწილზე სამუშაოდ.
კომპანიის აღწერა – ბიზნეს გეგმა ნაბიჯი 2
კომპანიის აღწერა არის ბიზნეს გეგმის ერთ-ერთი მნიშვნელოვანი ნაწილი, რომელიც დეტალურად წარმოაჩენს თქვენი ორგანიზაციის არსს, მისიას და სტრუქტურას. ეს სექცია უნდა იყოს ინფორმატიული და დამაინტრიგებელი, რათა მკითხველს მისცეს ნათელი წარმოდგენა თქვენი ბიზნესის შესახებ.
აი, რას უნდა შეიცავდეს კომპანიის აღწერა:
- კომპანიის ისტორია:
- დაფუძნების თარიღი და ადგილი
- დამფუძნებლების მოკლე ბიოგრაფია
- რა მოტივაციით შეიქმნა კომპანია მაგალითი: “TechInnovate დაარსდა 2020 წელს სან ფრანცისკოში ორი MIT-ის კურსდამთავრებულის მიერ, რომლებმაც გადაწყვიტეს შეექმნათ ინოვაციური გადაწყვეტილებები ურბანული მობილობის პრობლემების მოსაგვარებლად.”
- მისია და ხედვა:
- კომპანიის მიზნები და ღირებულებები
- გრძელვადიანი ხედვა მაგალითი: “ჩვენი მისიაა შევქმნათ უსაფრთხო და ეფექტური სატრანსპორტო სისტემები მეგაპოლისებისთვის. ჩვენი ხედვაა მომავალი, სადაც ყველა ქალაქი იქნება “ჭკვიანი” და მდგრადი.”
- იურიდიული სტრუქტურა:
- კომპანიის სამართლებრივი ფორმა (LLC, კორპორაცია, პარტნიორობა და ა.შ.)
- მფლობელობის სტრუქტურა მაგალითი: “TechInnovate არის დელავერში რეგისტრირებული C კორპორაცია, რომლის 60% ეკუთვნის დამფუძნებლებს, ხოლო 40% – ვენჩურულ ინვესტორებს.”
- ბიზნეს მოდელი:
- როგორ იღებთ შემოსავალს
- ძირითადი პროდუქტები ან სერვისები მაგალითი: “ჩვენ ვყიდით ჩვენს პროგრამულ უზრუნველყოფას SaaS მოდელით, სადაც ქალაქები იხდიან ყოველთვიურ გადასახადს ჩვენი სისტემის გამოყენებისთვის.”
- ინდუსტრია და ბაზარი:
- რომელ ინდუსტრიაში ოპერირებთ
- თქვენი სამიზნე ბაზარი მაგალითი: “ჩვენ ვმოქმედებთ ურბანული ტექნოლოგიების ინდუსტრიაში, რომელიც 2023 წელს შეფასებულია 158 მილიარდ დოლარად. ჩვენი სამიზნე ბაზარია 1 მილიონზე მეტი მოსახლეობის მქონე ქალაქები.”
- უნიკალური შეთავაზება:
- რა განგასხვავებთ კონკურენტებისგან
- თქვენი კონკურენტული უპირატესობა მაგალითი: “ჩვენი უნიკალური ალგორითმი, რომელიც იყენებს მანქანურ სწავლებას, საშუალებას გვაძლევს ვიწინასწარმეტყველოთ და ვმართოთ საცობები 95% სიზუსტით, რაც აღემატება ინდუსტრიის საშუალო მაჩვენებელს.”
- მიღწევები და ეტაპები:
- მთავარი მიღწევები დღემდე
- მომავალი მიზნები და ეტაპები მაგალითი: “2022 წელს ჩვენ დავნერგეთ ჩვენი სისტემა 5 დიდ ქალაქში და შევამცირეთ საცობები საშუალოდ 30%-ით. 2025 წლისთვის ვგეგმავთ გავფართოვდეთ 50 ქალაქში მსოფლიოს მასშტაბით.”
- ლოკაცია და ობიექტები:
- სად მდებარეობს თქვენი ოფისი(ები)
- წარმოების ან ოპერირების ადგილები მაგალითი: “ჩვენი მთავარი ოფისი მდებარეობს სან ფრანცისკოში, ხოლო კვლევითი ცენტრი – ბოსტონში. ასევე გვაქვს მცირე წარმომადგენლობები ლონდონსა და სინგაპურში.”
არათემატური შეხსენება: ბოლო დროს ყველაზე ძიებადი ფრაზა ხელოვნური ინტელექტი და ხელსაწყოები.
ბაზრის ანალიზი
ამ განყოფილების მიზანია დაინტერესებულ პირს აჩვენოთ რა ხდება ბაზარზე და რამდენად კარგად იცნობთ მას.
ინდუსტრიის მიმოხილვა
ეს ნაწილი აანალიზებს იმ სექტორს, რომელშიც თქვენი ბიზნესი ოპერირებს. აქ განიხილება ინდუსტრიის ზომა, ზრდის ტემპი, ძირითადი ტრენდები და ტენდენციები. ასევე მნიშვნელოვანია აღინიშნოს ტექნოლოგიური ცვლილებები, რეგულაციები და ეკონომიკური ფაქტორები, რომლებიც გავლენას ახდენს ინდუსტრიაზე.
სამიზნე ბაზარი
მოცემული სექცია ფოკუსირდება იმ კონკრეტულ სეგმენტზე, რომელსაც თქვენი პროდუქტი ან სერვისი ემსახურება. აქ უნდა განისაზღვროს კომპანიის იდეალური მომხმარებლები, მათი დემოგრაფიული მახასიათებლები, ქცევები და საჭიროებები. მნიშვნელოვანია ასევე სამიზნე ბაზრის ზომის და ზრდის პოტენციალის შეფასება.
ბიზნეს გეგმა აუცილებლად უნდა მოიცავდეს კონკურენტების ანალიზის
შევისწავლეთ ბაზარი, ახლა კონკურენტების დროა. ამ ნაწილში ხდება თქვენი პირდაპირი და არაპირდაპირი კონკურენტების იდენტიფიცირება. შემდეგ კი უნდა შეფასდეს კონკურენტების ძლიერი და სუსტი მხარეები, მათი საბაზრო წილი და სტრატეგიები. ეს ანალიზი დაგეხმარებათ განსაზღვროთ კომპანიის უნიკალური პოზიცია ბაზარზე და კონკურენტული უპირატესობა.
ბაზრის ანალიზი საშუალებას გაძლევთ უკეთ გაიგოთ გარემო, რომელშიც თქვენი ბიზნესი ოპერირებს, დაადგინოთ შესაძლებლობები და საფრთხეები, და შეიმუშაოთ ეფექტური სტრატეგიები წარმატების მისაღწევად.
არათემატური შეხსენება: ბოლო დროს ყველაზე ძიებადი ბიზნესთან დაკავშირებული ფრაზა ვალუტის კურსი დღეს.
პროდუქტები და სერვისების აღწერა
ბიზნეს გეგმის კრიტიკული კომპონენტი – პროდუქტებისა და სერვისების სექცია – წარმოაჩენს კომპანიის ძირითად შეთავაზებას. აქ დეტალურად აღიწერება თითოეული პროდუქტი თუ მომსახურება, მათი უნიკალური მახასიათებლები და მომხმარებლისთვის მოტანილი სარგებელი.
ეს ნაწილი ასევე მოიცავს ინფორმაციას ინტელექტუალური საკუთრების, კვლევისა და საქმიანობის განვითარების , წარმოების პროცესის, სამომავლო გეგმებისა და ფასწარმოქმნის სტრატეგიის შესახებ.
მიზანია, მკითხველს ნათლად დაანახოს კომპანიის შეთავაზების ღირებულება და კონკურენტული უპირატესობა ბაზარზე.
მარკეტინგული სტრატეგია
მარკეტინგული სტრატეგია განსაზღვრავს კომპანიის მიდგომას ბაზარზე. ეს სექცია ძირითადად მოიცავს ოთხ ძირითად ასპექტს: სამიზნე აუდიტორიის იდენტიფიცირებას, ფასწარმოქმნის პოლიტიკის შემუშავებას, პრომოციისა და რეკლამის მეთოდების განსაზღვრას, და გაყიდვების სტრატეგიის ჩამოყალიბებას.
აქ დეტალურად აღიწერება, თუ ვინ არის კომპანიის იდეალური მომხმარებელი, როგორ დგინდება პროდუქტის ან მომსახურების ფასი, რა გზებით მოხდება მათი პოპულარიზაცია და რეკლამირება, და რა ტაქტიკას გამოიყენებს კომპანია გაყიდვების გასაზრდელად.
დოკუმენტი მიზნად ისახავს განსაზღვროს და დაინტერესებულ პირს წარუდგინოს კომპანიის პოზიციონირება ბაზარზე, მომხმარებლების მოზიდვისა და შენარჩუნების მეთოდები და საბოლოოდ, ჩამოაყალიბოს ბიზნესის ზრდის გეგმა.
საოპერაციო ბიზნეს გეგმა
ოპერაციული გეგმა ასახავს კომპანიის შიდა მექანიზმებს, რომლებიც უზრუნველყოფს ბიზნესის გამართულ ფუნქციონირებას. ეს გეგმა ეფუძნება სამ ძირეულ საყრდენს:
წარმოების პროცესი გვიჩვენებს პროდუქტის შექმნის ან სერვისის მიწოდების გზას. აქ თავს იყრის ინფორმაცია გამოყენებული ტექნოლოგიების, აღჭურვილობის, ადამიანური რესურსებისა და მეთოდოლოგიების შესახებ, რომლებიც ერთობლიობაში კომპანიის შეთავაზებას აყალიბებს.
მიწოდების ჯაჭვი აღწერს პროდუქტის მოგზაურობას პირველადი რესურსებიდან საბოლოო მომხმარებლამდე. ეს მოიცავს მომწოდებლებთან ურთიერთობის სტრატეგიებს, მარაგების მართვის სისტემებს, ლოჯისტიკურ ოპერაციებსა და დისტრიბუციის არხებს.
ხარისხის კონტროლი წარმოაჩენს კომპანიის მიდგომას პროდუქტის ან სერვისის მაღალი სტანდარტების შენარჩუნებისადმი. ის გულისხმობს ხარისხის მონიტორინგის სისტემებს, დეფექტების აღმოჩენისა და აღმოფხვრის მეთოდებს და მუდმივი გაუმჯობესების სტრატეგიებს.
მენეჯმენტი და ორგანიზაცია
მენეჯმენტი და ორგანიზაცია წარმოადგენს ბიზნესის ხერხემალს, რომელიც განსაზღვრავს კომპანიის მუშაობის დინამიკას და ეფექტურობას. ეს არის სფერო, სადაც ადამიანური ფაქტორი და სტრუქტურული ელემენტები ერთმანეთს ერწყმის. სწორედ, ამიტომ ბიზნეს გეგმა შეძლებისდაგვარად ნათელ წარმოდგენას უნდა იძლეოდეს ადამიანური რესურსების მართვის მეთოდების შესახებ.
ორგანიზაციული სტრუქტურის სწორად მოწყობა ძალიან მნიშვნელოვანია პროცესის გამართულობისთვის. ის აღწერს კომპანიის შიდა არქიტექტურას – როგორ არის გადანაწილებული პასუხისმგებლობები და ვინ ვის ექვემდებარება. მარტივად, რომ ვთქვათ გვიჩვენებს თუ როგორ მიიღება გადაწყვეტილებები ორგანიზაციაში.
აქ კარგად უნდა წარმოაჩინოთ თქვენი გუნდის წევრების გამოცდილება და მიღწევები. სწორედ ამით დაანახებთ ინვესტორს, რომ სანდო ადამიანების ხელშია მათი ფული.
უნდა გქონდეთ ადამიანური რესურსების მართვის მკაფიო მიდგომა, რომელიც დაანახებს ინვესტორს თუ როგორ ზრუნავს კომპანია თავის თანამშრომლებზე. ეს მოიცავს დაქირავების სტრატეგიებს, თანამშრომელთა განვითარების პროგრამებს, მოტივაციის სისტემებს და კორპორატიული კულტურის ჩამოყალიბებას.
ბიზნეს გეგმა ციფრებში – ფინანსური მონახაზი
ფინანსური გეგმა არის ბიზნესის ციფრებში გამოხატული მომავალი. დოკუმენტი წარმოადგენს “ფულის შოვნის”, ბიზნეს მოდელს.
შემოსავლების პროგნოზი გამოხატავს კომპანიის ოპტიმიზმს კონკრეტულ რიცხვებში. ის გვიჩვენებს, თუ რამდენის გამომუშავებს ელოდება კომპანია გაყიდვებიდან. ამ დროს ძალიან დაგეხმარებათ ვალიდური სტატისტიკებისა და კვლევის შედეგების წარდგენა.
ამას გარდა ძალიან მნიშვნელოვანია დანახარჯების ანალიზი. ხარჯების პროგნოზი შეიძლება ითქვას რეალობის ტესტია. აქ ვხედავთ, რა დაჯდება ზემოთ ხსენებული შემოსავლების მიღება – დაწყებული ყოველდღიური საოპერაციო ხარჯებიდან, დამთავრებული გრძელვადიანი ინვესტიციებით. შედეგად კი მარტივად და ნათლად დაინახავს ინვესტორი, თუ რამდენად ეფექტურად იყენებს კომპანია რესურსებს.
ტექნოლოგიები
ტექნოლოგიური სტრატეგია წარმოადგენს თანამედროვე ბიზნესის დინამიურ ძალას, რომელიც განსაზღვრავს კომპანიის ინოვაციურობასა და კონკურენტუნარიანობას. აქ ვსაუბრობთ იმაზე, თუ როგორ აპირებს ორგანიზაცია გამოიყენოს ტექნოლოგია ბიზნეს ამოცანების მისაღწევად.
ტექნოლოგიური ინფრასტრუქტურა ქმნის კომპანიის ხერხემალს. ის მოიცავს აპარატურას, პროგრამულ უზრუნველყოფას და ქსელურ სისტემებს, რომლებიც ბიზნეს შესაძლებლობას აძლევს ეფექტურად იფუნქციონიროს.
არათემატური შეხსენება: საინტერესო სტატია ოქროს ფასი საქართველოში.
მდგრადი განვითარების ბიზნეს გეგმა
მდგრადი განვითარების გეგმა წარმოადგენს კომპანიის ხედვას იმაზე, თუ როგორ შეუძლია ბიზნესს იყოს წარმატებული დღეს ისე, რომ არ დააზიანოს ხვალინდელი დღე. ეს არის ბალანსი ეკონომიკურ ზრდას, გარემოს დაცვასა და სოციალურ პასუხისმგებლობას შორის.
გარემოსდაცვითი ინიციატივები გვიჩვენებს, როგორ აპირებს კომპანია შეამციროს თავისი ეკოლოგიური კვალი. ეს შეიძლება მოიცავდეს ენერგოეფექტურობის გაზრდას, განახლებადი ენერგიის წყაროების გამოყენებას, ნარჩენების შემცირებას და რეციკლირებას.
ასეთ საკითხებზე ყურადღების გამახვილებით ინვესტორს დაანახებთ საქმისადმი თქვენს მიდგომას.
საერთაშორისო ექსპანიის სტრატეგია
საერთაშორისო ექსპანსიის სტრატეგია კომპანიის ამბიციური გეგმაა გლობალურ არენაზე გასასვლელად. ეს არის რუკა, რომელიც გვიჩვენებს, როგორ აპირებს ბიზნესი გადალახოს საზღვრები და დაიპყროს ახალი ბაზრები.
ბაზრების შერჩევა და ანალიზი წარმოადგენს პირველ ნაბიჯს ამ მოგზაურობაში. ამ დროს კომპანია სწავლობს პოტენციურ ქვეყნებს, მათ ეკონომიკურ კლიმატს, კულტურულ თავისებურებებს და სამართლებრივ გარემოს. ეს არის თითქოს სადაზვერვო მისია, სადაც ბიზნესი ეძებს ოქროს შესაძლებლობებს უცხო მიწაზე.
შესვლის სტრატეგია გვიჩვენებს, როგორ აპირებს კომპანია ფეხის მოკიდებას ახალ ბაზარზე. ეს შეიძლება იყოს ექსპორტი, ფრენჩაიზინგი, ერთობლივი საწარმოს შექმნა ან პირდაპირი უცხოური ინვესტიცია. თითოეულ მიდგომას აქვს თავისი რისკები და შესაძლებლობები. მათი გაანალიზებით კი კომპანია ირჩევს გზას, რომელიც ყველაზე მეტად შეესაბამება მის მიზნებსა და რესურსებს.
პროდუქტის ადაპტაცია ასახავს თუ , როგორ ცვლის კომპანია თავის შეთავაზებას ადგილობრივი გემოვნებისა და მოთხოვნების შესაბამისად. ეს არის ბალანსი გლობალურ ბრენდსა და ლოკალურ რელევანტურობას შორის. აქ ვხედავთ, როგორ იცვლება პროდუქტის დიზაინი, შეფუთვა ან მარკეტინგული გზავნილები ახალი აუდიტორიის მოსაზიდად.
კულტურული ინტეგრაცია გულისხმობს თუ როგორ აპირებს კომპანია გახდეს ადგილობრივი საზოგადოების ნაწილი. ეს მოიცავს ადგილობრივი ტალანტის დაქირავებას, კულტურული განსხვავებების გაგებას და ბიზნეს ეტიკეტის დაცვას. ეს არის გზა, რომლითაც კომპანია ცდილობს გახდეს “მკვიდრი” უცხო მიწაზე.
საერთაშორისო ლოჯისტიკა და მიწოდების ჯაჭვი წარმოადგენს კომპანიის გეგმას გლობალური ოპერაციების მართვისთვის. ეს მოიცავს საბაჟო რეგულაციების ნავიგაციას, საერთაშორისო ტრანსპორტირების ოპტიმიზაციას და ადგილობრივი მომწოდებლების ქსელის შექმნას. მასში გამოხატული უნდა იყოს პროდუქტის ეფექტური მიწოდების გეგმა მსოფლიოს მასშტაბით.
ამასთან ერთად აუცილებელია რისკების მართვის მოდელის შემუშავებაც. ინვესტორს უნდა დაანახოთ თუ როგორ ემზადება კომპანია გლობალური ბიზნესის გამოწვევებისთვის. ეს შეიძლება მოიცავდეს ვალუტის რყევებისგან დაცვას, პოლიტიკური არასტაბილურობის გათვალისწინებას ან ინტელექტუალური საკუთრების დაცვას საერთაშორისო დონეზე.
ინტელექტუალური საკუთრების დაცვა
ინტელექტუალური საკუთრების დაცვა არის კომპანიის ინოვაციური იდეებისა და შემოქმედებითი ნამუშევრების დაცვის ფარი. ეს არის სტრატეგია, რომლის წყალობითაც გონებრივი შრომის ნაყოფი არ გახდება სხვების მიერ უკანონოდ მითვისების ობიექტი.
ბიზნესის სპეციფიკიდან გამომდინარე, წარუდგინეთ ინვესტორს პატენტების პორტფოლიო და დანახეთ, რომ ინტელექტუალური საკუთრება უსაფრთხოდ იქნება დახული.
პარტნიორები და ალიანსები
პარტნიორობა და ალიანსები წარმოადგენს კომპანიის სტრატეგიულ გეგმას, თუ როგორ აპირებს იგი გააფართოოს თავისი შესაძლებლობები და გავლენა სხვა ორგანიზაციებთან თანამშრომლობით. ეს არის ბიზნესის ხელოვნება, სადაც 1+1 შეიძლება 3-ის ტოლი გახდეს.
- რა ტიპის ბიზნესებთან მოგიწევთ თანამშრომლობა?
- რას სარგებელს მოუტანთ თქვენს პარტნიორებს?
- სანაცვლოდ რას მიიღებთ ამ ურთიერთობებისგან?
და ა.შ.
კორპორატიული სოციალური პასუხისმგებლობა (CSR)
კორპორატიული სოციალური პასუხისმგებლობა (CSR) კომპანიის ეთიკური კომპასია, რომელიც მიმართავს ბიზნესს არა მხოლოდ მოგებისკენ, არამედ საზოგადოებისა და გარემოს კეთილდღეობისკენაც. ეს არის სტრატეგია, რომელიც აჩვენებს, როგორ აპირებს კომპანია იყოს კარგი კორპორატიული მოქალაქე.
მაგ: გარემოსდაცვითი ინიციატივები წარმოადგენს კომპანიის ძალისხმევას, შეამციროს წარმოების ეკოლოგიური კვალი. ეს შეიძლება მოიცავდეს ენერგოეფექტურობის გაზრდას, განახლებადი ენერგიის წყაროების გამოყენებას ან ნარჩენების მართვის ინოვაციურ მიდგომებს.
ბიზნეს გეგმის დანართები
ბიზნეს გეგმის დანართები მოიცავს დამატებით, დეტალურ ინფორმაციას, რომელიც ავსებს ძირითად დოკუმენტს. ძირითადი დანართებია:
- ფინანსური პროგნოზები და გაანგარიშებები
- სარეზიუმეები ან ბიოგრაფიები
- ბაზრის კვლევის მონაცემები
- პროდუქტის/სერვისის ტექნიკური სპეციფიკაციები
- იურიდიული დოკუმენტები (ლიცენზიები, პატენტები)
- კონტრაქტები ან შეთანხმებები
- ფოტოები ან დიაგრამები
- მარკეტინგული მასალები
ეს დანართები ეხმარება მკითხველს უფრო სიღრმისეულად გაეცნოს ბიზნესს და მის გეგმებს.
