1975 წელს კოდაკმა ციფრული ფოტოკამერის პირველი პროტოტიპი დაამზადა. აღფრთოვანებულმა თანამშრომლებმა კომპანიის მენეჯმენტს ახალი პროდუქტის ბაზარზე ჩაშვება შესთავაზეს.
ეს რევოლუციური გამოგონება ნამდვილად ფურორს მოახდენდა და საბოლოოდ დააჩქარებდა ტექნოლოგიურ განვითარებას. წესით ყველაფერი ამ ლოგიკით უნდა განვითარებულიყო, მაგრამ კოდაკის ხელმძღვანელი ასე არ ფიქრობდა…
ციფრული ფოტოკამერის ბაზარზე გამოჩენამდე ფოტოებს ფირებზე ამჟღავნებდნენ და ისე ბეჭდავდნენ. კოდაკი ამ ბაზრის უპირობო ლიდერი გახლდათ, მისი კამერები იაფი ღირდა, მაგრამ შემოსავლების დიდ ნაწილს ფირების გაყიდვით იღებდა.
1975 წელს ციფრული კამერის შექმნამ კოდაკის მმართველები ჩააფიქრა: თუ ამ პროდუქტს ბაზარზე გამოიტანდნენ, მაშინ ფოტოფირების ბიზნესი გაქრებოდა და აწყობილი სისტემა დაინგრეოდა. რაც მოკლევადიან პერსპექტივაში კომპანიას დიდ დანაკარგებს მოუტანდა. ამიტომ პროდუქტის გამოტანა დროებით გადადეს. ეს “დროებით” კი 2000-იან წლებამდე გაიწელა.
პოპულარული სტატია: “სანთლების” სიგნალი – როდის ვიყიდოთ ან გავყიდოთ?
90-იანი წლების მიწურულს ბაზარზე ახალი კონკურენტები გამოჩნდენ, რომლებმაც მომხმარებლებს ციფრული კამერები წარუდგინეს. კოდაკი ამ დროს ისევ თავის ძველ პროდუქტს აუმჯობესებდა. როდესაც მიხვდა, რომ კონკურენტების ინოვაციის გამო დიდ თანხებს კარგავდა, გადაწყვიტა თავადაც აჰყოლოდა მათ თამაშს და ციფრული კამერა ბაზარზე 2000-იანი წლების დასაწყისში გამოიტანა. თუმცა სამწუხაროდ ეს ნაბიჯი დაგვიანებული აღმოჩნდა. კოდაკმა ამის გამო ბაზრის ლიდერის პოზიციაც კი დათმო.
კომპანიის მთავარი პრობლემა ახლომხედველობაში გახლდათ, სამედიცინო ენაზე, რომ ვთქვათ კოდაკს მიოპია სჭირდა. მან ძალისხმევა არსებული პროდუქტის გაუმჯობესებაში ჩადო, მიუხედავად იმისა, რომ ინდუსტრიის ციფრული კამერების მიმართულებით განვითარებას ამჩნდევდა.
კიდევ უფრო მარტივად, რომ ვთქვათ კოდაკი მიმდინარე ტექნოლოგიაზე ჩაიციკლა, პროდუქტზე ორიენტირებული გახდა. ამიტომ გრძელვადიანი ტენდეციები, რომლებიც საფრთხეში აყენებდა მის პროდუქტებს, დააიგნორა. შედეგად კიმარკეტინგული მიოპიის გამო მწვერვალიდან ფსკერზე დაეშვა.
ხშირად ძიებადი თემა: ოქროს ფასი დღეს
რას ნიშნავს მარკეტინგული მიოპია?
ფრაზა “მარკეტინგული მიოპია” პირველად ეკონომისტმა თეოდორ ლევიტმა გამოიყენა. მისი აზრით, კომპანიების გარკვეული ნაწილი “ახლომხედევლობით” გამოირჩევა. მათი გადაწყვეტილებები ეფუძნება მოკლევადიან პერსპექტივაში მისაღწევ ამოცანებს, რის გამოც ბაზრის გრძელვადიანი ტენდენციები თვალსაწიერის მიღმა რჩება. ეს იგივეა ავტომობილის მართვისას მხოლოდ მანქანის კაპოტს უყუროთ.
მარკეტინგული მიოპია ხელს უშლის ბიზნესებს დაინახონ ინდუსტრიის ცვლილებები და თვალი გაუსწორონ უხეშ რეალობას. მაგალითად: ონლაინ მედიის გამოჩენამ დიდი დარტყმა მიაყენა გაზეთების ინდუსტრიას. გაზეთების იმ მფლობელებმა, რომლებმაც თავიდანვე შეაფასეს ციფრული სამყაროს ძალა წინასწარ დაიწყეს ამისთვის მზადება. ვინც ვერ გაითვალისწინა გრძელვადიანი ტრენდები უბრალოდ გაკოტრდა.
ამისათვის, რომ უფრო შორსმხედველები გავხდეთ, ლევიტის აზრით, საჭრიოა, რომ მენეჯერები პროდუქტზე ორიენტირებულის ნაცვლად გახდნენ ინდუსტრიაზე ორიენტირებულნი.
მარკეტინგული მიოპია, რომ არ დაგემართოთ ხშირად მოიძიეთ ინფორმაცია ბაზრის სავარაუდო ტრენდებზე, გაანალიზეთ მიმდინარე მოვლენები და გაიაზრეთ სად იქნება თქვენი კომპანია 5 ან 10 წლის შემდეგ.
